|
|
Við íblástri frá størstu motiónsrenning í heiminum, DHL stafettini, verður skipað fyri stafett-renning á havnarlagnum í Havn leygardagin 22. august kl. 14:00 (upphiting frá 13:40). Faroe Express Stafettin er ein stuttleikakapping fyri fyritøkur og stovnar. Hetta er einasta renning í landinum, ið er málrættað til starvsfelagar. Tí er tað eitt frálíkt høvi at finna saman við øðrum á arbeiðsplássinum og gera ein hugnaligan starvsfólkadag burturúr. Aftur við og aftan á renningina verður undirhald á Eystaru Bryggju, soleiðis at hetta gerst ein óførur dagur við samanhaldi, frískari luft, rørslu og hugna. Á skránni er millum annað tónleikur, matur og drekka, vinningar, síga í reipi av bingjum, heiðursmerkir osfr. Luttøkugjaldið er 200 kr fyri hvønn (600 kr fyri liðið), fer til ungdómsarbeiði innan renning. Høvuðsstuðulin, Faroe Express, samstarvar við Bragdið um at senda ungdóm til kappingar uttanlands. Hvørt lið hevur tríggjar luttakarar, ið renna/ganga 3 km í part, tilsamans 9 km. Vit lata eina ókeypis renniblus til allar luttakarar umframt ein gávuposa við ymiskum góðum. Freistin at melda liðið til stafettina er 18. august, men tak longu nú í herðatoppin á starvsfeløgunum. |